前Morning娘隊長　靠婚變身價漲十倍

兩年前，身高145cm嘅前Morning隊長矢口真里，同身高相距50cm嘅中村昌也拉埋天窗。雖然高度無阻當年真愛，不過今年5月，就爆出人妻矢口劈腿，同男模喺屋企鬼混斷正！離婚、形象受損、上個月仲宣佈無期限暫停演藝工作喺屋企反省，不過…過咗一個禮拜咋嘛，佢同佢位情人梅田賢三就被日本傳媒影到去撐枱腳，之後仲拜訪香閨喇！咁樣搞法，好有可能被事務所請佢食「豉椒炒魷」o架喎！

不過當你以為佢真係會一鋪清袋嘅時候，前日就有報道話唔少電視台私下揾佢呀！為啲乜？咪就係貪佢夠話題性，上節目獨家講婚變囉！聽講身價大拿拿升咗成10倍呀！由平時嗰啲綜藝節目嘅20萬日元騷錢，跳到o依家分分鐘值成250萬日元！

仲有，根據日本法律規定，離婚必須半年之後先至可以再婚。所以有消息話矢口打算「冷河」一過，年底就同佢位新歡情人再婚！速度快唔快呢就唔知，不過o依家佢算唔算事業愛情兩得意呢？

[img]http://static.apple.nextmedia.com/images/apple-photos/video/20131119/org/1384805557_e262.jpg[/img]

來源:蘋果日報網站