譚小環生意跌六成仍撐學生

佔中行動持續影響商戶生意，譚小環經營的心血小食店正好位於銅鑼灣渣甸街佔據點附近，佔領頭幾日道路癱瘓食店首當其衝，生意額大跌六成！

[img]http://www.bastillepost.com/wp-content/uploads/2014/10/wnep096p01f.jpg[/img]

問到經濟損失時，小環坦言：「都死唔去嘅，只係冇乜點賺到錢咁囉！做生意好天斬埋落雨柴係咁架啦！」縱使白做，老闆娘無激動怪責學生，反而在十月一日國慶拉閘罷巿一日支持學生以用和平、理性方式爭取民主。

[img]http://www.bastillepost.com/wp-content/uploads/2014/10/wnep096p01c.jpg[/img]

月租十幾萬，加埋夥計人工同埋水電雜費，譚小環經營的小食店每月支出真不少，受佔中影響最近幾乎蝕做，但小環冇怨言，指就算不能開車出入，兩公婆改搭港鐵仍然開心：「學生係未來社會棟樑，佢哋為民主發聲出發點係好嘅，當然，唔好影響到民生係大前題。呢件事上亦睇到佢哋發揮團結精神，為咗訴求喺條街度日曬雨淋，自律到令人另眼相看，好感動。」

[img]http://www.bastillepost.com/wp-content/uploads/2014/10/wnep096p01d.jpg[/img]

所以老闆娘小環都有向學生提供物資，送一箱箱水以示支持：「有時學生哥過嚟買魚蛋，我哋又會自發性咁送多串！」小環認為每件事最重要是溝通，大家先肯坐低聆聽各方面的聲音，各讓一步就會海闊天空，希望件事可以盡快圓滿得到解決。

[img]http://www.bastillepost.com/wp-content/uploads/2014/10/wnep096p01a.jpg[/img]

提到有商戶受佔中衝擊「呻」有結業危機，小環說：「其實做生意好天斬埋落雨柴，就算喺市道低迷都堅守原則保持食物質素，而且要應變，比如做吓減價優惠套餐，好似我哋咁，夏天冇乜人買熱嘢食，唯有加推雪糕、牛柏葉魷魚、炒麵等去迎合季節性口味，所以我哋吸納到一班長期粉絲！就算依家生意唔好點都死唔去嘅！（會唔會多咗落舖做人肉生招牌吸客？）哈哈，咁又唔使咁刻意，其實呢間小食店已作為我標記，好多人都知係我開啦，我保持每周落兩次啦！」

[img]http://www.bastillepost.com/wp-content/uploads/2014/10/IMG_0843.jpg[/img]